2018 Fresh start !
السلام عليكم ورحمه الله وبركاته ♥♥
سنه سعيده عليكم (متأخر كالعاده ) ويارب يجعلها سنه خير وبركه عليكم ♥
وزي كل بدايه سنه احب اكتب مخططاتي والاشياء اللي ابغى اطلع بيها من
دي السنه
2017 ماكانت بالشكل اللي انا كنت ابغاه حصلت فيه اشيااء كتير خلتني
اصحى على نفسي واعرف حقيقه اشياء كتير .
مع بدايه 2017 ماتو اثنين من اكثر الناس اللي كنت احبهم في السوشال
ميديا : حمزه وهناء اسكندر محاربين السرطان ربي يغفر لهم ويرحمهم
وفي نفس السنه اكتشفنا انو عمتي كمان عندها نفس المرض !
فاا مع دي الصدمات عرفت شي
العمر مره وحده وممكن في يوم وليله الامور كلها تنقلب وامرض لا سمح
الله ,
او اموت اذا جا يومي ودا كلو وانا لسام اسويت شي في حياتي !
فا قررت في دي السنه
كل يوم هي فرصه جديده ليا بما اني لسا عايشه , فرصه اسوي فيها عمل خير
ينكتب لي فيه اجر وفرصه اعيش حياتي صح ,وعشان الحياه مره وحده بعد كدا ابدا ماحضيع
وقتي في اشياء انا مااحبها ماعندي ابدا وقت للمجامله بعد الان هههه
كل الصداقات الفاشله اللي انا بضحي وبصبر فيها حقيقي مالها لزمه
أي شخص بحس اني مامرتاحه لوجوده قطعت علاقتي بيه (الكلام
دامايعني انكم تمشو لاي كائن ماعاجبكم تقولو ليهو انا قطعت علاقتي بيك , جيبوها
بطريقه ظريفه وماتفضحونا بالله )
بالمقابل الناس اللي بحس بالراحه وبنبسط لما اكون معاهم بتقرب ليهم
اكتر
-
اقعد اكتر مع اهلي و صحباتي
-
امارس الحاجات اللي بحبها : تصوير تدوين وما الى ذلك
-
اخفف شويتين من السوشال ميديا
لانو بتخلي الواحد مشغول على لا شي
( محدثتكم الان
من قلب الازمه جوالي خرب وقاعده للان يومين مقطوعه عن العالم الخارجي )
احساس جمييل والله وتحسي ماعندك هم حقيقي الجوال بيجيب الهم
-
احاول استرخي اكتر يوقا اكتر أتنفس اكتر !
في السنه اللي راحت جا وقت وانا مشوشه جدا
حسيت اني لازم استرخي واطول بالي واطول بالي واطول بالي (لاني في الحقيقه عككس كدا
بتنرفز سريع جدا )
يعني اذا اتنرفزت وزعلت حستفيد حاجه ؟ طيب
الشخص اللي خلاني متنرفزه حيخسر حاجه ؟
فعشان كدا سوف اطول بالي للغايه و(حقعد اتحسبن عليكم
في داخلي ههه امزح والله )
وفي الفتره الاخيره قرات كثيير عن اليوقا
واهميتها فوائدها للجسم وللنفسيه حسييتها كننز ! حجربها باذن الله وانقل تجربتي
عنها .
قرأت عباره جدا جميله وواقعيه !
" انت مسؤول عن سعادتك , اذا توقعت من
الأخرين جعلك سعيدا سوف تكون خائب الظن دائما ً "
-
اصنع انت سعادتك
ماتنتظر احد ودور على الحاجات اللي انت بتحبها اقرا عنها
اكتر شوف فيديوز او جربها !
اكتشف اشياء جديده يمكن انت مابتعرف انك
بتحبها !
● اكتشفت اني بحب الاوبرا جدااا وبحب العود والكمان ونفسي اجرب اعزف
عليهم
● بحب الاغاني اللي بعزف الجيتار اكتر من أي شي تاني
ححط لكم رابط عزف اضوى الدخيل على الجيتار لأغاني كتير عشان تفهمو قصدي اكتر
https://soundcloud.com/adwa-aldakheel
استمتعو بكل لحظه انتو عايشين فيها خلو كل يوم فيه شي جديد ومميز وحتى ولو كان صغير !
- لا تستنو اليوم المناسب اصنعو انتو يومكم المناسب
دمتم في حب ♥
Fatem
تعليقات
إرسال تعليق