الروتين اليومي للمدرسة

سبتمبر 07, 2014

الروتين اليومي للمدرسة

*تدوينه محدثه :) 23-1-2016

السلام عليكم ورحمة الله ♥ .

كيفكم وكيف المدارس طولت طولت بقوة بس من جد كل ما ابى افضى وانزل شي يحصل لي شي وانسى بس ان شاء الله بعوضكم .

طيب اليوم حتكلم عن العودة للمدارس والروتين الصباحي

اول شي نبدا للترتيبات الي في الليل وتسويها قبل , تجهزي اشيائك الاساسيه اللي حتحتاجيها :شنطة اقلام دفاتر نوت الخ ..

رتبي جدولك من الليل عشان لو سبتيه الين الصباح بتصير حفلة صدقوني وانا اختكم والله ايام اقول لنفسي خلاص الصباح اعبيه واصحى متأخر واقول ياليت فاحسن شي رتبي من الليل وخلي عندك دفتر او نوتة صغيرة تكون معاكي بكل حصة واكتبي فيها كل شي يعني مثلا احياء :واجب صفحة كذا , مطوية وكدا أي شي تطلبو منك المعلمة في حصتها اكتبي عشان يوم ترجعي البيت ماتقعدي فترة تفتكري يكون خلاص كل شي جاهز هذي النقطة اختيارية اذا ذاكرتك قوية ماشاءالله ,
استخدمت هذه الطريقه بسنه ثالث ثانوي ومنجد تغيرت وارتفع معدلي الحمدلله ..

بعدين خلاص غسلي وجهك بالغسول اللي يناسبك
وجيبي قطنة وبموية باردة مرريها على وجهك عشان تتقفل المسامات .

الصباح بعد ماتدخلي الحمام وانتو بكرامة وتتروشي استخدمي مقشر خفيف انا استخدم دا مرة جميل وفي مقشر قارنيه كمان حلو بس يناسب البشره الدهنيه والمختلطه

بعدها رطبي وجهك ولا تنسي تحطي واقي شمس لان شمسنا ماترحم ! ولاتنسي تحطي مزيل عرق وحطي شوية من عطرك المفضل
perfume oil حق ذا بودي شوب بططل مايروح بسرعة وجميل وخفيف

البسي مريول وشرابك وشوزك وانتو بكرامة
لرائحه العرق اللي تكون في الرجل او الشوزات ممكن تحطي من بخاخ الارجل من ذا بودي شوب جدا منعش

مشطي شعرك كذا تكوني جاهزه تقريبا نجي للميك اب المكياج يختلف على حسب انتي في ايه مرحله مكياج الجامعيه يفرق من طالبه المدرسه لان في المدرسه في بعض الممنوعات فاالاتسوي نفسك (انا اللي امشي عكس النظام ومحد يوقفني وماهمني احد بالعكس خليكي محترمه وامشي بالنظام صدقيني حيحترموكي اكثر ) وبكلامي هذا ما أقصد انك تروحي وجهك كذا صااحي توه من النوم حعطيكي طرق بسيطه تبينك مرتبه وجميله
اول شي نستخدم :

بي بي كريم : لان فيه نسبه واقي شمس ومرطب للبشره

كحل : اذا كان مسموح لكي فحلو يمديكي تحطي شي بسيط افتكر لما كنت في الثانوي انتقلت من مدرسه ل مدرسه تانيه الثانيه كان يسمح بالمكياج البسيط اللي يعكس انوثتك فقط حبيتهم مره