Khartoum city : how we spend our vacation
Khartoum city :
how we
spend our vacation ?
كيف قضينا اجازتنا في الخرطوم !
السلام
عليكم ورحمه الله وبركاته ♥
سافرنا للخرطوم من بورتسودان يوم 30 -5 يعني نص رمضان
الصراحه دي أطول اجازه نسافر فيها من زماان
حكتب ليكم اسامي الأماكن المشيناها وعجبتنا
طبعا الخرطوم
بقت مافي مقارنه بيها وبين مصر من حيث المطاعم والكافيهات , اللهم بس مافيها
المحلات العالميه ستاربكس كوستا ماكدونادز وكدا
لكن بقت يها مطاعم حلوه شيد بس انت تتقل جيبك هههه
-
مانويلا
حب كبير للمطعم دا في كل سنه لما اجي
الخرطوم بمشيه وبكون بنفس المستوى
مع انه سمعت من كم وحده انه اكله بقى
"ضارب" لكن بالنسبه لي كان رهيب
أسعاره مناسبه جدا وجلساته جميله عنده
خارجيه وداخليه
مشينا اول يوم عيد بعد مالقينا زحمه خرافيه
في المطاعم الجمب برشلونه وشاورما عربي
المحل كان مامليان شديد وكنا كتاار
ماشاءالله
الحساب طلع 500 جنيه واكلنا وبقينا كمان
ماشاءالله
-
سيتي بلازا مول
المول دا يمكن انا الوحيده الحبيتو وكل
الباقيين بيكرهوو لي ماعارفه بحسو لزيز كدا وهادي وفاضي مازي عفراء ازعاج وفيهو
اشكال غريبه كدا !
المحلات اللي فيهو أسعاره منطقيه جدا جدا
وعنده مطاعم لا بأس بها مشينا مرتين مره
كان تالت عيد الفطر واكلنا من لزيز
ياخوانا لزيز بحس بيهو مفروض يدخل من قائمه
التراث السوداني
كل اجازه لما امشيه ببحس يادوب انا جيت
السودان
-
حوش السمك
مطعم بتاع سي فود بسس وانا أصلا ماخالص في
النوع دا
لكن كل المعاي اجمعو انو رهيب شديد
وماحتلقو سمك احسن من اللي بيقدموهو
اليوم دا كنا معزومين , لكن الأسعار حسيتها
غاليه بالنسبه للسودان أي نحن بنصرف نفس الأسعار دي في السعوديه لكن فرق العمله !
والحقيقه كنا كتاار لا كتار شديد ماشاءالله
الحساب تقريبا 2 مليون وشويه
يعني الفين وشويه
ماعارفه غايتو ماكنت حدفع مبلغ زي دا في
سمك عكس امي وخالو هههه
-
لؤلؤه النيل
انا بحب الخرطوم عشااان الحتات الزي دي
مكان عامل زي بوت واقف وجمبو واحد متحرك
بياخدك في جوله في النيل
شادن الجميله (عايني قلت ليكي جميله )
عزمتنا قهوه وحاجه نسيت اسمها بس زي الشيبس لكن ماشيبس اكلت مره زيها في مكه كان
اسمو كرمبو , ماعارفه اسمها بالضبط في السودان شنو
-
شارع النيل : كاتي بطاطس وزلابيا – كنافتي
انا من الناس البحب شارع النيل مررا كتير
ياجماعه ممكن ما اطلع أي مكان غيره
شاي مقنن وزلابيا بالشوكلاته والقشطه من
كاتي
كنافه من كنافتي
حاجه رهيبه مابقدر أتكلم فيها كتير بس لو
مشيتو الخرطوم امشو ليهم بالذات ناس كنافتي
رهيبين رهيبين
والاثنين اسعارهم مناسبه جدا
-
عفراء
انا مابحب عفراء مااابحبو لكن عندهم زي
معرض كتب بتحت عجبني وأسعار الكتب كويسه شديد
اخدت منهم harry potter and the cursed child
وفي محل في الطابق الأول اسمه شوكلا مي
برضو رهيب وعجبني اكتر ممن ديلايس القايمين
بيهو الناس
واسعارهم مناسبه , عندهم برضو مطاعم تمشي
الحال
 | |
| شوكلا مي |
 | |
| الكتاب اللي اشتريته من المعرض |
-
برادايس هوتيل
مشينا مع بنات عمي يوم المباراه النهائيه
لكأس العالم
اسعارهم غاليه نقطه
-
كافيين
المحل كمحل ظريف شديد وتعاملهم ظريف
لكن يمكن نحن الحظنا ماحلو ؟
غايتو عندهم تركيش كوفي زابطه باقي الحاجات
عاديه جدا مقارنه بالسعر
*أي صح نوت صغنون مشينا يوم الايفينت بتاعهم
وافنان نست النظاره بتاعتا هناك كلمتهم في الانستقرام انو لو لقو النظاره يكلموها
, كلمو كل الاستاف بتاعم وتاني يوم كلمونا انو نجي ناخد النظاره هاااو كيوت (امي
كانت بتقول خلاص ماحتتلقى حيشيلوها ويبيعو الفريم بتاعها هههه )
-
الواحه مول
حسيته حلو والله مع انه مشينا يوم جمعه
والصباح فكانت أغلب المحلات قافله
مطاعمهم احسن من عفراء وسيتي بلازا
-
ذا رانش
مطعم ظريف شديد واكلهم حلو بس الحلى عندهم
!؟.. ماعارفه يمكن حظنا اليوم داك ؟ البراونيز كيكه شولاطه عاديه والسوفليه برضو
كيكه وفيها شوييييه شوكلاته سايله والاثنين بجي معاهم زي اسكريم لزيز كدا
البيتزا برضوو حلوه عندهم بنات خالتي اخدو
الفريدو
اسعارهم تعتبر غاليه
-
اميره ست الشااي
الحب ياخ كل سنه لما بجي بيكون في اجازه
عيد الأضحى فبتكون قافله وبرجع بدون مااشرب عندها
أخيرا يااخوانا أخيرا لقيتها فاتحه
-
أي ون I one
-
طربوش
شفتو المطعم اللي بيمشي الحال ؟ ديل هما
بالزبط بيفك أزمات بالزات انه كان قريب شديد من البيت
أسعارهم مناسبه جدا
-
ايتالي بيتزا itally pizza
غايتو المطعم دا يوم كدا ويوم كدا مرا
اكلنا منه كان رهيب ومرا مابطال نفسيات شكلو
أسعاره مناسبه
-
سلطان شاورما
برضو من المطاعم البتفك أزمات
أسعاره مناسبه
ولو انتو متابعني في الانستاقرام حتعرفو
انو كان عندنا عرس
اول مره احضر عرس سوداني كامل يعني بيكون
أسبوع من الحفلات والربه والهجيج
مع انه بشوف الموضوع دا تو متش ومرهق والله
لكل الناس فما بالك بي اهل العرس زاتهم
 | ||
| حنه العريس |
 | |
| wedding day |
استمتعنا شديد بس انا مابحب عدم الاستقرار
دا ههه يعني 3 شهور كتيره شديد
يمكن عشان انا شخصيه روتينيه ولا مايبقى
عندي روتين معين بحس بخلل كدا في النظام ههههه
أتمنى ليكم يوم ملون وجميل مثلكم ♥♥
كل الحب ♥
فطيم
تعليقات
إرسال تعليق