sanganeb سنقنيب

السلام عليكم ورحمه الله وبركاته ♥♥

شهر فبراير دا كان بالجد رهيب بكل ماتعنيه الكلمه

حكتب بوست كامل منفصل عن  الشهر ده  لانه موضوع الليله لازم كون لحاااله

جزيره سنقنيب

حسب وصف ويكيبيديا : سنقنيب جزيرة تابعة لولاية البحر الأحمر وهي عبارة عن محمية بحرية تقع على مقربة من مدينة بورتسودان في المياه الإقليمية السودانية   الاولى داخل البحر الأحمر.وهي المحمية البحرية  في السودان. تتميز المحمية بوجود الشعب المرجانية وما يصاحبها من وجود نباتي وحيواني من أسماك وأحياء بحرية أخرى. تقرر أن تصبح محمية كان بقرار تاريخه (1 يناير 1990).^[1]

اول لما حطيت صوره ورقه التصريح في ستوري الانستا , الناس كلها قامت وعايزا

تعرف كيف تمشي ولما مشينا ووصلنا وشافو الصور الخيااليه زااد الموضوع

عشان كدا قلت حكتب أي حاجه انا بعرفها وممكن تساعدكم

اول شي عايزا اوضح حاجه : 

رحلات هيئه المواني بتكون رحلتين في الشهر يوم 1 ويوم 15

بتمشي مقر العمليات البحريه موقعها قدام بورتسودان مول وتسجل اسمك وبس تجي صباح اليوم لان الطق بيتحرك الساعه 7

الحصل لينا ..

كان معاي قريباتي شادن وتمارا وكانو مسافرين يوم السبت 24-2

وجو يوم الاثنين 12

فما كان في أي رحله

( لقيت رحلات سياحيه ناس عندهم بوت او يخت يعني وبعملو رحلات

سعر الفرد حوالي 700 جنيه بيوفرو ليك التصديق ووجبات وعندهم رحلات غوص كمان )

فما كان عندنا حل الا نكلم مدير المواني البحريه , عايزين نمشي سنقنيب لكن قبل يوم السبت

هههه والله كان طلب تعجيزي

لاخر لحظه يوم الخميس العصر قالو عايزين اسماء الناس العايزا تمشي

قالو ان شااء الله حنحااول قد مانقدر نوديكم بكرا

طبعا في الوقت دا نحن في البيت مااااقدارين نصدق !!

نفس اليوم المغرب طلعو لينا خطاب من هيئه المواني وتتوثق عند شرطه المواني تقريبا 

(الصراحه الموضوع دا انا ماعارفاه بالضبط لانه انا ماعملته بنفسي فماعارفه الحاصل شنو ههه ومن هذا المنبر نشكرالاستاذ ادريس بري مدير العلاقات بهيئه المواني والاستاذ احمد محجوب اللي تعبو معانا شديد)

يوم الجمعه  الساعه 6 ونص صبااحا نحن كنا في محل عمليات المواني

المكان المنو حنتحرك.

كان في رحله من جامعه النيلين جو برضو معانا

(الفهمتو بعد ما رجعنا انو رحله الجامعه دي كانت مفروض تكون بعد كم يوم لكن قدموها عشان نقدر نمشي معاهم )

باي ذا واي ياناس النيلين بناتكم ظرااف شديد هههه

اتحركنا بالضبط الساعه 7 ص  مسافه ساعه ونص او ساعتين تقريبا ووصلنا جزيرتنا

هنا يظهر " الطق" او البوت اللي جينا بيه

اعترف ان عندي عائله مجنونه هههه

اول ماوصلنا كان في استقبال من دلافين ! والله دلافييين حواليننا ياخي جمال

المكان ساااحر جدا البحر صااافي ابدا مازي الكورنيش اللي بكون وسخان من المطاعم الحوالينو

حاجه صاافيه ومن كثر ماهو صافي ونضيف بتشوف أي شي تحت بدون ماتنزل او تغوص

الشعب المرجانيه الاسماك الملونه الوان غريبه موف كحلي اصفر

في سلاحف بتشوفها بتمشي في الاطراف وسرطان البحر كان متواجد بكثره

المناره الرائعه دي اذا قدرتو تطلعوها (صحبتكم ماقدرت تكمل الربع هههه )

بتشوفو منظر رهيب من فوق

 شادن وافنان ورهف ماقصرو نقلو لينا الوضع من فوق

افنان بتصور لصحباتها سمثنق

فطرنا بعدين جا واحد من الناس اللي شغالين في المناره اخدنا

 وودانا في غرفه جوا اطلالتها على البحر على طول

لوهله حسيت نفسي في المالديف والله

من داخل البلكونه \ شرفه الغرفه

شباك الغرفه !

ملاحظه صغنونه : هناك مافي خدمات يعني اكل وشرب احسن تجيبو حاجاتكم معاكم

بعدين قعدنا نتونس مع كابتن عادل

 اللي بقى يحكي لينا عن الجزيره دي ولي سموها محميه وانه المناره الموجوده دي

 بنوها سودانيين !

 (وعشان يكون صاادق اكثر قال فقط الجزء التحت بنوه المصريين وماقدرو يكملوه , فكملو البنيان السودانين وهي حكايه بتاعت كم وعشرين طابق )

قعدنا زي ساعه ونص ورجعنا وفي طريقنا للرجعه كابتن عادل وواحد من ناس المواني (ماعرفت اسمه ),  خلونا نشوف قمره القياده

ولما قربنا نوصل الكابتن بدا يشرح لينا كيف حنرسي في الميناء

وبدا يعرفنا على ما يسموه " بالطق " وهي زي اليخت كدا بيستخدموه في شغلهم

 فرقه من اليخت ان اليخت سياحي فقط .

كانت تجربه رائعه بالجد حقيقه أي احد حيزور بورتسودان او قاعد في السودان عموما

 يجي يزور الجزيره لانها متعه مابتتوصف لا بالكلمات لا بالصور 

-         ملاحظه صغنونه مني : الجزيره دي ممكن الدوله تستفيد منها كتير ! استغربت لي ماعاملين فيها نشاطات كانو ممكن يكسبو كتير  او رجال الاعمال ممكن يفتحو زي منتجعات زي المالديف بالضبط لانه صدقوني مافي فرق وهما مااحسن مننا في حاجه هههه نحن عندنا محميه هما عندهم شنو

او مطاعم على البحر (لكن فكرت ان ممكن توسخ المكان فخلاص بلاش خلينا في المنتجع )

السياحه في السودان ممكن تطور كتيير ياجماعه نركز بس مع الموضوع دا وحنمشي لقدام باذن الله

وفي الاخير شكر كبير لهيئه المواني البحريه على رأسها 
- المدير العام لهيئه المواني البحريه:
 د جلال الدين محمد احمد شيليه
- مدير العمليات البحريه
- كابتن عادل : قبطان رحلتنا الرائعه 

شكرا بابا لانك زبطت لينا الموضوع كلو ههه

حتلاقو صور في الانستا والفيسبوك عن الرحله دي من خلال الهاشتاق / الوسم :

#FatemXSanganeb

دمتم في حب ♥

فطيم