فطيم في الشماليه
FatemXShamaliyah
بسم الله الرحمن الرحيم
قبل كم اسبوع وتحديدا ايام العيد قررنا نقضي كم يوم في البلد
(الشماليه – شمال السودان)
مده رحلتنا كانت 4 ايام (الصراحه انا
اللي رجعت بدري .. حتعرفو بعدين لي )
المسافه تعتبر شويه طويله من الخرطوم
اممم تقريبا زي مسافه جده المدينه تقريبا (حكايه بتاعت 5-6 ساعات كدا )
اليوم الأول
طلعنا من امدرمان الساعه 4 ونص الفجر ! تاني يوم العيد
وصلنا الساعه 7 وربع منطقه اسمها تمتام (مامتأكده من الاسم )
وعلى الساعه 11 كنا اتجاوزنا دنقلا ووصلنا منطقتنا المنشوده تاجاب حوالي الساعه 1
ملاحظه صغنونه : سافرنا بسياره
فا أعتقد بتكون اسرع من الباص
طيب قبل ما أبدا في الوصف
نحن اصحاب
والاصحاب مابيزعلو من بعض
خصوصا اهلي الكرام
تاجاب ودلقو الاثنين حلاتهم مااابتخلص لكن المعيشه المعيشه يااخوتي صعبه للغايه
تاجاب مافيها كهربا فكانو جايبين مولد للبيت , الشبكه احسن ماأتكلم
فيها لانو حتأثر شديد وممكن ابكي هههه , الحمامات الله يكرمكم برضو ماحتكلم فيها
لانو كل مااتذكر بجيني هبوط هههه
*دلقو : وفق وصف ويكيبيديا إحدى محليات السودان تقع في
منطقه النوبه وهي حاضرة المحس كما تحتوي على أثار قديمه
الجدير بالذكر انو منطقتنا دي اقصى الشمال يعني اسوء الفروض لو ضعنا
في الطريق حنوصل مصر
طيب نرجع
تاجاب
اعتقد اكتر شي حسيته جميل في المنطقه دي طبعا غير مناظرها الجميله
ناسها الحلوه , الاستقبال اول ماوصلنا خصوصا انه جدي كان طول ماراح (سنتين او
تلاته كدا يعني طول شدييد هههه)
فا الاستقبال كان رهيب رهيب بجد
من الحاجات الحلوه برضو لما دخلنا بيت جدو اتذكرت كل حكاوي ابوي عنهم
زمان وقصصه هو واخوانه ولما كانو بيلعبو في الحوش
احساس انك بتسمع قصص حصلت في مكان بعدين تشوف المكان دا على
الحقيقه احساس حلو شديد
اليوم الثاني
اللي هو تالت ايام العيد
اعمامي ضحو وتقريبا كل الناس الموجودين في البلد جو بيتنا
أي بيت واحد كبير ممكن يكفي اهل البلد كلهم
نفس اليوم بالمسا اتحركنا على غرب دلقو محليه سدله عشان ازور اهل امي
على قول ميسر ولد خالتي
نحن ماشين المدينه هههه
وعمو عاطف بيعاكسه وبيقول
لي تاجاب احلى بكتير منها دلقو شنو ياخ
المسافه بين تاجاب ودلقو زي ساعتين كدا
ووصلنا قصر العمده محمد طه عباس فقيري
جدي الله يرحمه
ماطولنا كتير لانه صباح اليوم التاني رجعنا بس
قدرت اشوف جزء من الاثار اللي كانت قدام القصر
كانت معبد او حاجه زي دي
رجعنا تاجاب واخدنا جوله سريعه على النخيل اللي فيها
 |
| ذا مومنت لما بقطف في البلح ههههه |
لقينا جزء محروق من النخل طلع انو كان في حريق كبير السنه اللي راحت
ماعارفه اسباب الحريق كانت شنو بالضبط لكن الاهمال عامل من عوامله
 |
| من اثار الحريق |
 |
اليوم الرابع مااعتقد بيتحسب لانه رجعنا الصبااح الخرطوم
عموما تجربه حلوه بس مااعتقد حعيدها في القريب العاجل
ممكن اذا وصلو فيها كهربا
(قالو في الاشهر الجايه حيوصلو نقول يارب )
وبقت فيها دكاكين كدا وحمامات
الله يكرمكم زي العالم والناس
نسجل ليها زياره تانيه
البلد جميله بس عايزا اهتمام اكتر عشان تكون اجمل والناس تبدا تزورها
*تقدرو تشوفو صور عن
الرحله دي من خلال الوسم (هاشتاق) دا سواء على الانستقرام او الفيسبوك : FatemXShamaliyah#
دمتم في حب ♥
Fatem
 |
| كانت مفروض تكون لقطه شاعريه بس مع الغروب لم تزبط معنا |
أزال أحد مشرفي المدونة هذا التعليق.
ردحذف